Haqqımızda
AZƏRİT ASC — milli keramzit istehsalçısı
Sənayenin qüdrəti, təbiətin harmoniyası — Azərbaycanın milli keramzit istehsalçısı.
AZƏRİT ASC Azərbaycan Respublikasının 29 noyabr 1996-cı il tarixli, 208-İQ nömrəli qanunu əsasında təsdiq edilmiş “Dövlət müəssisələrinin səhmdar cəmiyyətinə çevrilməsinin qaydaları haqqında” Əsasnaməyə uyğun olaraq yaradılmışdır. Müəssisə keçmiş “Azərtikintimaterialsənaye” Dövlət Konserninin tabeliyində fəaliyyət göstərmiş “Azərit” Tikinti Materialları Kombinatının istehsal bazası əsasında formalaşdırılmışdır.
Zavodun tikintisi hələ SSRİ dövründə başlanmış və regionun ən iri sənaye müəssisələrindən biri kimi layihələndirilmişdir. Müəssisədə “AZƏRİT” markası altında yüksək keyfiyyətli yüngül doldurucu — keramzit istehsalı nəzərdə tutulmuşdur. Tikinti işləri 1993-cü ildə başa çatdırılmış, lakin SSRİ-nin dağılmasından sonra müəssisə müəyyən müddət fəaliyyətsiz qalmışdır.
Şirkət Sumqayıt şəhərində, Bakı–Rostov şossesinin 31-ci kilometrliyində yerləşir və ümumi sahəsi 5.4 hektar olan iri sənaye ərazisini əhatə edir.
Yerli, ekoloji təmiz tikinti materialı
AZƏRİT ASC-də keramzit yüngül doldurucu tikinti materialının istehsalında əsas məqsəd ölkənin tikinti sektorunu müasir Dövlət Tikinti Standartlarına cavab verən yerli və ekoloji təmiz materialla təmin etmək olmuşdur. Müəssisənin yaradıldığı dövrdə regionda keramzit istehsalı çox məhdud idi və bu materialın idxalı yüksək maliyyət tələb edirdi.
Nəticədə tikinti sahəsində əsasən təbii çınqıl və digər ağır dolduruculardan istifadə olunurdu ki, bu da həm tikinti konstruksiyalarının çəkisini artırır, həm də ekoloji və texniki problemlər yaradırdı.
Möhkəm, yüngül, ekoloji
Arı pətəyi strukturu
Məsaməli daxili quruluş sement və birləşdiricilərin nüfuzunu asanlaşdırır, daha möhkəm və monolit beton əmələ gətirir.
Suya davamlılıq
Adi çınqılın hamar səthindən fərqli olaraq, keramzit beton qatları arasında su nüfuzunu və parçalanma riskini minimuma endirir.
Ekoloji təmizlik
Yüksək temperaturda bişirilmiş təbii gildən hazırlanır, nəfəsalma xüsusiyyəti və təbii mikroiqlim yaradır.
Enerji səmərəliliyi
İsti havada sərinlik, soyuq havada istilik saxlama qabiliyyəti yaşayış və sənaye tikintisində enerji qənaəti yaradır.
Drenaj və örtüklər
Suyu uzun müddət saxlama qabiliyyəti onu asfalt örtüklərində, drenaj sistemlərində və yağışlı iqlim üçün ideal edir.
Tikinti qənaəti
Bünövrədə ~30%, yuxarı mərtəbələrdə ~10%-ə qədər armatur və beton qənaəti yaradır.
Yüksək seysmik davamlılıq
Yüngül çəkisi və möhkəm strukturu sayəsində zəlzələ zamanı tikililərə düşən yük azalır, konstruksiyanın dayanıqlılığı artır. Bu xüsusiyyət keramziti göydələnlərin və iri mühəndis qurğularının tikintisi üçün xüsusilə əlverişli materiala çevirir.
Təbii resursların qorunması
Təbii çınqılın çay yataqlarından çıxarılması ətraf mühitə ciddi təsir göstərərək çayların axın istiqamətini dəyişir, landşaft quruluşunu pozur və ekoloji tarazlığa mənfi təsir edir.
Keramzit isə alternativ və ekoloji təhlükəsiz doldurucu kimi təbii resursların qorunmasına, yaşıl tikinti texnologiyalarının inkişafına və müasir ekoloji standartların tətbiqinə xidmət edir.
SSRİ ənənəsindən müasir Avropa standartlarına
SSRİ dövründə strateji tikinti layihələrində ağır təbii doldurucuların istifadəsi məhdudlaşdırılır və yüngül keramzit əsaslı materiallara üstünlük verilirdi. Hazırda isə Avropa ölkələrində enerji effektiv, ekoloji təmiz və müasir tikinti texnologiyalarında keramzit geniş şəkildə tətbiq olunur.
AZƏRİT ASC də bu ənənəni davam etdirərək Azərbaycanın tikinti sektorunu yüksək keyfiyyətli, müasir və ekoloji təhlükəsiz keramzit məhsulları ilə təmin etməyi əsas strateji istiqamətlərindən biri hesab edir.